மாற்றுத் திறனாளியாக இருந்த நான் இனி உங்கள் சகோ ஹசனாக...

''மாற்றுத் திறனாளி'' என்ற பெயரை மாற்றி ''உங்கள் சகோ ஹசன்'' என்று வைத்திருக்கிறேன்.ஏன் இந்த மாற்றம் என்பதற்கான சிறு விளக்கம்தான் இப்பதிவு.

முதலில் என் அறிமுக பதிவில் என் பெயரயோ,என்னைப் பற்றிய வேறு தகவல்களயோ கூறாததற்க்கு இரண்டு காரணம் கூறி இருந்தேன்.

அதில் ஒன்று : 

எனது இணைய நண்பர்களுக்கு என் உடல் நிலை குறித்து தெரியாது.தெரிந்தால் மிகவும் வருத்தப்படுவார்கள் என்பதால். 


ஆனால் சில நாட்களுக்கு முன்னாள் என் இணைய சகோக்கள் அனைவருக்கும் என்னைப் பற்றி சொல்லி விட்டேன்.நாங்கள் உங்களுடன் இருக்கிறோம்  தொடர்ந்து எழுதுங்கள் என்று அவர்கள் கொடுத்த ஊக்கம் ஈடில்லாதது.

அவர்கள்தான் இணையத்தில் வெட்டியாக சுற்றிக் கொண்டிருந்த என்னை பண்படுத்தியவர்கள்.

அவர்களின் பதிவுகள்தான் எழுத வேண்டும் என்ற ஆர்வத்தை என் உள்ளத்தில் ஏற்படுத்தியது.என் கை வலிகளையும் மறந்து அவர்களுடன் உரையாடதான் ஓரளவு வேகமாக தட்டச்சி பழகினேன்.

மனிதர்களை அவர்கள் மனம் மகிழும்படி அடையாளப்படுத்துங்கள்
என்ற எனது பதிவை படித்து பாராட்டியதுடன் சிந்திக்க தூண்டிய ஒரு விடயத்தையும் முன்வைத்தார்கள்.

அது :  நீங்கள் உங்களின் உண்மையான பெயரில் எழுதினால்தான் உங்களின் பெயர் பதிவுலகில் 'எழுத்தாளர்' என்று நிலைக்கும். இல்லையேல்... என்னதான் நீங்கள் பதிவுலகில் உங்கள் எழுத்துத்திறனை கொட்டி ஏகப்பட்டோரை வென்றெடுத்தாலும் "மாற்றுத்திறனாளி" என்றே இப்பெயரை கடைசி வரை நிலைத்துவிடும்.


இதைப் படித்த பிறகுதான் என் தவறு எனக்கு உரைத்தது.நானே என்னை ஏன் மாற்றுத் திறனாளியாக அடையாளப்படுத்திக் கொள்ள வேண்டும் என்று தோன்றியது.பெயரை மாற்றி விடுவதே சிறந்தது என்று முடிவெடுத்தேன்.

என்ன பெயர் வைக்கலாம் என்று வினவிய போது என் பதிவில் இருந்தே ஒரு வரியை சுட்டிக் காட்டினார் ஒரு சகோ.

''எங்களுக்கு பார்த்து,பார்த்து அழகிய பெயர் சூட்டினார்களே....எதற்காக?......
தம்பி கேள்வியும் நீயே ...?
பதிலும் நீயே..?''

என்று சொன்னதும் சிந்தித்து  சொந்த பெயரிலேயே எழுதலாம் என்றே இப்பெயரை தேர்வு செய்தேன். நான் உங்கள் அனைவருக்கும் சகோதரனாக இருப்பேன் என்ற அடிப்படையில் உங்கள் சகோ என்ற வார்தையயும் இணைத்துள்ளேன் :)

மாற்றுத் திறனாளி என்ற பெயர் மாறினாலும் மாற்றத்தை கொண்டு வரும் என் பதிவுகள் இறைவன் நாடினால் முன்பு போலவே, இல்லை முன்பை விட வீரியமாகவே வரும் என்ற உறுதியுடன்.........


 உங்கள் சகோ ஹசன் 


------------------------------------------------------

எனது அறிமுக  பதிவில் சகோதரி ஹுஸைனம்மா இப்படி கருத்திட்டு இருந்தார்.

---//உலகத்துலயே on-screen keyboard ல பிளாக் எழுத போற முதல் ஆள்
நானா கூட இருக்கலாம்.//

புதிய தகவல். எப்படி இந்த முறையைப் பயனப்டுத்துறீங்கன்னு ஒரு பதிவா எழுதுங்களேன்.---

இது அவருக்காக.

விண்டோஸ் 7 இயங்குதளத்தில் START MENU > ACCESSORIES > EASY OF ACCESS > ON-SCREEN KEYBOARD என்பதை கிளிக் செய்தால் கீழே உள்ள புகைப்படத்தில் உள்ளது போன்ற விசைப் பலகை திரையில் தோன்றும்.

அதன் மேல் உள்ள எழுத்துக்களின் மேல் மவுஸ் கர்சரை வைத்து ஒவ்வொரு எழுத்தாக கிளிக் செய்ய வேண்டும்.இப்படித்தான் எழுதி வருகிறேன்.உங்கள் கணினியின் விசைப் பலகை செயல்படாத போது இது உங்களுக்கு உதவக் கூடும்.

இறைவன் நாடினால் மீண்டும் சந்திப்போம். 

	Tweet